Heb 8 | KZE | STEP | súnda-ainkona ááimba maarán-iye. mirán-áíváꞋ-mónó-káwáánákó kentáásí mono-káwáánákó kwíyómpaꞋa ména usáyaaitamaimo kawáá uráiwai ayáánúrapꞋa asirayán-áyámpáꞋá maraꞋá máyáiye.

Hebrews 8

Ísuma kentáásí aivaꞋ-mónó-káwáánáꞋán-iye kwaasái.

1 súnda-ainkona ááimba maarán-iye. mirán-áíváꞋ-mónó-káwáánákó kentáásí mono-káwáánákó kwíyómpaꞋa ména usáyaaitamaimo kawáá uráiwai ayáánúrapꞋa asirayán-áyámpáꞋá maraꞋá máyáiye. 2 kwaásimo naambó kwéesamo Áánútuntavesa mindáúmpáꞋá imáyáa kwéombanivo kwíyómpaꞋa Ísóigo naan-úramba úmakowana Ísu Káráísiti mimpímbá Áánútuna aokaꞋ-náúmpáꞋá uména aivaꞋ-mónó-káwáánákóná mayáí kwémayaiye.

3 marapáꞋ-áíváꞋ-mónó-kwáásí póí tuvuwésa toómbá maésa umái Áánútumba aménááontavesa usásintinkaraavo Ísu Káráísiti kentáásí aivaꞋ-mónó-káwáánákó moórá-yantaaꞋo Áánútumbo ámakaimba mindá puwéna kwenáúma ámakaiye. 4 kwaásimo sáwíꞋo uráantavesa ámáánkomo siráintemba póímo tuvúꞋmáímo Áánútumbo ámém-bayai kwémayaan-kwaasi máyáambanivo Ísu Káráisiti marapáꞋó ménaraankasi íma póí tuvúꞋmái Áánútumba amísino. 5 kwíyómpaꞋo naan-úrambo úmakaiwaina amankóꞋnaankaan-damba marapáꞋá kwáyáísasa mindáúmpáꞋá monoꞋ-máyáí kwémayaawe. miráumai naaóváꞋá Mósesi aivaꞋ-mónóꞋ-námbá índayavena úwana Áánútu simámena séna Sáínai-omapaꞋa agaráárankaunda-namba mirán-dámbá uwó súwana Mósesi kwíyómpaꞋo kwáyáin-dankona amankóꞋnaankaan-damba úmakaiye. 6 kwíyómpaꞋa Ísu monoꞋ-máyáí kwémayaim-bayaigo marapáꞋó monoꞋ-máyáímó kwémayaam-bayaigomba usáyaaitaraiye. Áánútu séna kaweꞋá umátinkanaumne simái tarúmakain-aimba Ísu Káráísiti kwéagaraasinkaimba mináínkó ááémo simáímo tarúmakain-ainkomba usáyaaitaraiye. 7 ááémo simáímo tarúmakain-ainkomo kwaásimo arupí umátínkarainkakai Áánútu íma aúná-aimba simái tarúmakaisino.

8 Áánútu kwená kwaási tuwánómba sáwíꞋa uwaná mindáyavena áwááꞋa séna maarán-áímbá súwana Áánútun-aai aúváí-kwandaaivimba agaimaréna séna

Ísóigo séna moórá-kanaa tínaꞋa aúná-aimba simái tarúmareꞋa Ísareri-kwaasiye Yútaa-kwaasiye aúná-aimba simái tarútinkanaumne.

9 Ísípi-maravakemba miwí tíkwáꞋnáma ayútinkeꞋa tíꞋmaeꞋa tiráundaraꞋa aaí simái tarúmakaundanivo mináímbá kárówaꞋa sínaaemba umátímakaumne. aúná-aimba simái tarúmareꞋa íma ááéraan-ainkaamban-ivo aúná-aimban-iye Ísóigo séna 10 moórá-ainkwaraꞋa séna moórá-kanaa tínaꞋa Ísareri-kwaasiyaveꞋa aúná-aimba simái tarútinkaandaraꞋa kesí ámáámba tirumpiné imáyáavine timéꞋa miwítí Áánútu máyáanasa kesí kwaási-iꞋa umái ménaaowe. 11 minkánáá tínasa miwítí kwaásiye óꞋon-kwaasiye íma tááyesa ÁánútunopaꞋa teró sénááowe. anón-kwaasiye úwoi-kwaasiye amáparawai áꞋa tiráamba pósa íma ókwaraꞋa tááyanaaowe. 12 sirumbá umátinkeꞋa sáwí-imayaa maitiyuwéꞋa misáwí-ímáyááyávéꞋa íma imáyáa úmae iyónaumne Ísóigo siráiye agaimaréna siráiye. 13 Áánútu aúná-aimba simái tarúmaranaumne siráimba póna aivaꞋó simáímo tarúmakain-aimba ááéraan-aimba isaná ááéraan-tantaaꞋa sáwíyankaꞋa kwéna ánásanimba póna ááéraan-aimbo éna sáwíyankaꞋa ánásaniye.